Baholash va monitoring

Taʼlim sifatini baholash va monitoring qilish boshqarmasi

Boshqarma bo‘limlari:

– Taʼlim standartlari va dasturlarining samaradorligini tahlil qilish boʻlimi

– Oʻquv-metodik komplekslar va multimedia resurslarining samaradorligini tahlil qilish boʻlimi

– Oʻquvchilarning bilimlarini baholashning ilgʻor metodlarini ishlab chiqish va joriy etish boʻlimi

– Xalqaro dasturlar va tadqiqotlarda ishtirok etishni taʼminlash boʻlimi

Boshqarma maktabgacha, umumiy oʻrta va maktabdan tashqari taʼlim tashkilotlari tomonidan davlat taʼlim standartlari va talablari bajarilishi, oʻquvchilar bilimi va taʼlim sifatiga taʼsir qiladigan omillarni aniqlash va tizimli monitoringni amalga oshirishi talablari hamda tartibini belgilaydi, hamda bu boʻyicha davlat siyosatini olib boradi. Boshqarma tarkibida toʻrtta boʻlim mavjud boʻlib, ular boshqarmaning umumiy vazifalarini amalga oshirishda faoliyat yuritadi

Taʼlim standartlari va dasturlarining samaradorligini tahlil qilish boʻlimi

Boʻlimning asosiy vazifalari:

Boʻlim faoliyatini vakolatli davlat organlari bilan birgalikda maktabgacha, umumiy oʻrta va maktabdan tashqari taʼlim tashkilotlari, shuningdek, oʻquv kurslarida joriy etilgan oʻquv rejalar va standartlarning samaradorligini taʼlim standartidan kelib chiqib muntazam tahlil qiladi va baholaydi hamda zarur hollarda qoʻshimcha va oʻzgartirishlar kiritish boʻyicha tavsiyalar ishlab chiqadi.

Boʻlim tomonidan amalga oshirilgan ishlar:

2024-yilda “Yangi taraqqiyot bosqichida maktab taʼlimini rivojlantirish strategiyalari: chaqiriqlar, muammolar, tadqiqotlar va yechimlar” mavzusidagi xalqaro ilmiy-amaliy konferensiya tashkil etildi.

2024-yilda Koreya taʼlimni rivojlantirish instituti (KEDI), Koreya oʻquv dasturlari va baholash instituti (KICE), Uzoq sharq universiteti (FEU) va Koreya milliy transport universiteti (KNUT) bilan hamkorlik munosabatlari muhokama qilindi hamda ikki tomonlama memorandum imzolandi. KEDI va KNUT bilan hamkorlikda uzoq muddatli grant loyihalarni amalga oshirish belgilangan.

2025-yilda 220 mingdan ortiq oʻquvchilar roʻyhatdan oʻtgan Iqtidorli bolalar Respublika olimpiadasi 2-11-sinflar oʻquvchilari uchun Matematika hamda 9-11-sinf oʻquvchilari uchun Fizika, Informatika va axborot texnologiyalari fanlaridan tashkil etilmoqda. Olimpiada oʻtkazish orqali oʻquvchilarning oʻzlashtirish natijalarini tahlil qilinishi va bu orqali ta’lim standartlari va dasturlarining samaradorligini aniqlash belgilangan.

Oʻquv-metodik komplekslar va multimedia resurslarining samaradorligini tahlil qilish boʻlimi

Boʻlimning asosiy vazifalari:

Taʼlim sohasini rivojlantirishga qaratilgan tahliliy tadqiqotlar oʻtkazish, taʼlim jarayonida jahon ilm-fani va texnologiyalari yutuqlaridan keng foydalanish boʻyicha ilmiy ishlanmalar va tavsiyalar tayyorlaydi. Taʼlim sohasidagi ilgʻor amaliyotni oʻrganish va tizimli tahlil qilish, uni respublikada joriy etish shu bilan birgalikda yetakchi xorijiy ilmiy-tadqiqot tashkilotlari bilan aloqalarni rivojlantiradi. Jamlangan tajribalar asosida respublikada joriy etilayotgan oʼquv-metodik majmualar va multimedia resurslarining samaradorligini davriy tahlil qiladi.

Boʻlim tomonidan amalga oshirilgan ishlar:

Zamonaviy taʼlim jarayonini raqamlashtirish, baholash va samaradorligini oshirish bugungi kunning dolzarb masalalaridan biridir. Shu maqsadda taʼlim koʻrsatkichlarini kuzatish va tahlil qilishning yagona vositasi sifatida “yagona ko‘prik” axborot tizimi ishlab chiqilmoqda.

Shuningdek, aniq va tabiiy fanlar boʻyicha amaliy mashgʻulotlarni tashkil etishda yordam beruvchi multimedia resurslarining samaradorligini aniqlash yuzasidan tadqiqot olib borildi. Ushbu tajriba natijalari asosida taʼlim jarayonida axborot texnologiyalaridan samarali foydalanishni baholashga xizmat qiluvchi amaliy instrument shakllanmoqda.

Oʻquvchilarning bilimlarini baholashning ilgʻor metodlarini ishlab chiqish va joriy etish boʻlimi

Boʻlimning asosiy vazifalari:

Boʻlim taʼlim tashkilotlari faoliyatini baholashda vakolatli organlar bilan hamkorlikda ishlaydi, ilgʻor xalqaro amaliyotlarni inobatga olgan holda zamonaviy baholash metodlarni ishlab chiqib joriy etadi. Oʻquvchilar, oʻqituvchilar va ota-onalar oʻrtasida milliy soʻrovnoma oʻtkazib, taʼlim sifati va ijtimoiy-maʼnaviy muhitni tahlil qiladi, o‘qitish natijalariga ta’sir qiluvchi omillarni aniqlab, ularni bartaraf etish bo‘yicha tavsiyalar ishlab chiqadi. Shuningdek, taʼlim jarayonini yaxshilashga doir qonunchilikda belgilangan choralarini qoʻllaydi. Yetakchi mahalliy va xorijiy ekspertlarni jalb etgan holda tadqiqotlar oʻtkazadi, konsalting va ekspert xizmatlarini koʻrsatadi. Olingan ilmiy va tahliliy natijalarni tajriba-sinovdan oʻtkazib, bosqichma-bosqich amaliyotga tatbiq etadi.

Boʻlim tomonidan amalga oshirilgan ishlar:

Boʻlim tomonidan formativ baholashni rivojlantirish maqsadida 4K koʻnikmalarini baholash rubrikalari ishlab chiqilib, taʼlim jarayonida qoʻllash uchun uslubiy qoʻllanma nashr etildi. Shuningdek, ta’limda baholash va monitoringni tashkil etish asoslari, baholashning nazariy va metodik jihatlariga doir o‘quv-uslubiy qoʻllanma ham tayyorlandi. Shular qatorida, xalqaro hamkorlar, UNICEF ekspertlari, mahalliy mutaxassislar ishtirokida “O‘quvchilarni baholash konsepsiyasi” ishlab chiqildi. Bundan tashqari, xalqaro tajribalarga tayangan holda milliy taʼlim soʻrovnomasi instrumentlari ishlab chiqildi. Shu bilan birga, “Baholash nazariyasi va amaliyoti” boʻyicha videodars tayyorlanib eʼlon qilib kelinmoqda.

Xalqaro dasturlar va tadqiqotlarda ishtirok etishni taʼminlash boʻlimi

Boʻlimning asosiy vazifalari:

Oʻquvchilarning taʼlimdagi yutuqlarini baholash boʻyicha xalqaro dasturlar va tadqiqotlarda umumtaʼlim muassasalari oʻquvchilari ishtirokini taʼminlashda koʻmaklashadi;

Oʻquvchi-yoshlarining savodxonligini xolisona baholash, ularning olgan bilimlarini amaliyotda qoʻllash qobiliyatini rivojlantirish borasidagi xalqaro tadqiqotlarda ishtirok etish yuzasidan takliflar tayyorlaydi;

Taʼlim jarayoniga ushbu yoʻnalishdagi ilgʻor amaliyotlarni (MELQO, TIMSS, PISA, EQVET va boshqalar) hisobga olgan holda taʼlim sifatini baholashning zamonaviy metodlarini joriy qilish boʻyicha takliflar tayyorlaydi;

Oʻzbekiston Respublikasida taʼlim sifati sohasida xalqaro dasturlar va tadqiqotlar oʻtkazilishini tashkillashtirishda ishtirok etadi;

Boʼlim tomonidan amalga oshirilgan ishlar:

Boʻlimning 3 nafar mutaxassislari Oʻzbekiston respublikasini Xalqaro baholash dasturlari (PIRLS, TIMSS, PISA, TALIS)da ishtirokini taʼminlash boʻyicha A.Avloniy nomidagi pedagogik mahorat milliy institutida tashkil etilgan ishchi guruh aʼzosi hisoblanadi;

A.Avloniy nomidagi pedagogik mahorat milliy instituti bilan hamkorlikda 2024-yil 4 – 18-aprel kunlari respublikamizning 14 hududidan tanlab olingan 210 ta maktablarda Oʻqitish va taʼlim olishni oʻrganish xalqaro TALIS 2024 tadqiqotining asosiy soʻrovnoma jarayonlari, 2024-yil 3 – 18-may kunlari respublikamizning 14 ta hududidan tanlab olingan 83 ta maktablarda PISA 2025 tadqiqotining tajriba-sinov jarayonlari muvaffaqiyatli tashkil etildi;

Xalqaro tadqiqotlarda munosib ishtirok etish yuzasidan 6 ta videodars ishlab chiqildi, 10 dan ortiq seminar-treninglar  tashkil etildi, 11 ta ilmiy-publitsistik maqolalar eʼlon qilindi hamda “PISA va TIMSS tadqiqotlariga tayyorgarlik: matematik savodxonlikni rivojlantirish boʻyicha topshiriqlar toʻplami” nomli oʻquv qoʻllanmasi nashr etildi;

TIMSS 2023 tadqiqot natijalariga bagʻishlangan xalqaro hisobot va  Milliy ensiklopediya Maktabgacha va maktab taʼlimi vazirligi, A.Avloniy nomidagi pedagogik mahorat milliy instituti bilan hamkorlikda ishlab chiqildi.