“Yosh olimlar va tadqiqotchilar maktabi” loyihasi boʻyicha davra suhbati o‘tkazildi

Oʻzbekiston Respublikasi Prezidentining 2023-yil 20-apreldagi “Ilmiy-metodik va tadqiqot ishlari sifatini oshirish orqali ta’lim tizimini kompleks rivojlantirishni jadallashtirish bo‘yicha chora-tadbirlar to‘g‘risida”gi PQ-128-son qarorida ta’lim sohasini rivojlantirishga qaratilgan tahliliy va amaliy tadqiqotlar o‘tkazish, ta’lim jarayonida jahon ilm-fani va texnologiyalari yutuqlaridan keng foydalanish bo‘yicha ilmiy ishlanmalar va tavsiyalar tayyorlash, ilg‘or amaliyotni o‘rganish va tizimli tahlil qilish hamda uni respublikada joriy etish bo‘yicha kompleks chora-tadbirlarni qabul qilish boʻyicha vazifalar belgilangan.

Mazkur vazifalarning ijrosini taʼminlash maqsadida joriy yilning 1-iyul kuni Taʼlimni rivojlantirish respublika ilmiy-metodik markazida “Yosh olimlar va tadqiqotchilar maktabi” loyihasi boʻyicha davra suhbati tashkil etildi.

Unda Oliy attestatsiya komissiyasi, Abdulla Avloniy nomidagi pedagogik mahorat milliy instituti mutasaddilari hamda Alfraganus universiteti va boshqa pedagogika oliy taʼlim tashkilotlari, ilmiy-tadqiqot muassasalari hamda olimlar ishtirok etishdi.

Tadbirda Ta’limni rivojlantirish markazi direktori v.v.b Yuliya Risyukova “Yosh olimlar va tadqiqotchilar maktabi”ning ahamiyatiga to‘xtalib o‘tar ekan, ushbu tashabbus yosh olimlarning ilmiy izlanishlari uchun keng yoʻl ochishini ta’kidladi. 

"Bugun biz taʼlim sohasini yanada rivojlantirish, iqtidorli yoshlarni ilmiy izlanishlarga jalb etish va ularning salohiyatini toʻliq roʻyobga chiqarishga qaratilgan muhim tashabbus – “Yosh olimlar va tadqiqotchilar maktabi” loyihasi doirasida birlashib turibmiz.

Loyihaning asosiy maqsadi – yosh tadqiqotchilarni ilmiy faoliyatga metodik va axborot jihatdan tayyorlash, ularni zamonaviy ilm-fan va texnologiyalar yutuqlari, ilgʻor xorijiy tajriba va innovatsion yondashuvlar bilan tanishtirishdan iborat.

Bugungi davra suhbati orqali biz loyihaning asosiy yoʻnalishlari, ilmiy-amaliy oʻquv kursi, yosh tadqiqotchilar uchun yaratilayotgan imkoniyatlar va kelgusidagi rejalar yuzasidan fikr almashamiz.

Ishonchim komilki, ushbu tashabbus orqali yosh olimlarimiz uchun ilmiy izlanishlar olamiga keng yoʻl ochiladi, ularning ilmiy salohiyati toʻla roʻyobga chiqishi uchun zarur shart-sharoitlar yaratiladi. Bu esa milliy ilm-fanimizning yangi bosqichga koʻtarilishiga xizmat qiladi", – dedi Yuliya Risyukova. 

 Shuningdek, Oliy attestatsiya komissiyasi raisi maslahatchisi Bahodir Jovliyev mamlakatimizda ilm-fan sohasida amalga oshirilayotgan islohotlarga to‘xtalib, “Yosh olimlar va tadqiqotchilar maktabi” bu borada ilmiy izlanuvchilarni metodik qo‘llab-quvvatlashda muhim maydon bo‘lishini qayd etdi.  

"Bugungi kunda davlatimiz rahbari tomonidan ilm-fan, xususan, yosh olimlarni qo‘llab-quvvatlash bo‘yicha ko‘plab islohotlar amalga oshirilmoqda. 

Ushbu islohotlarga monand ravishda Oliy attestatsiya komissiyasi tomonidan ham yosh olimlarni ilmiy va metodik jihatdan qo‘llab-quvvatlash, ularning salohiyatini to‘la namoyon etishlari uchun zarur sharoitlar yaratish borasida ko‘plab ishlar amalga oshirilmoqda. 

Mazkur jarayonlardan kelib chiqib, aytishim mumkinki, bugungi o‘tkazilayotgan anjuman ham oliy ta’lim va ilm fan sohasini yanada takomillashtirishda muhim qadamlardan bo‘lib xizmat qiladi", – dedi Bahodir Jovliyev.  

Taʼkidlash lozimki, loyihaning maqsadi taʼlim sohasini rivojlantirishga qaratilgan tahliliy va amaliy tadqiqotlar oʻtkazish, jahon ilm-fani va texnologiyalari yutuqlari, ilgʻor amaliyotni oʻrganish va tizimli tahlil qilish hamda uni respublikamiz miqyosida joriy etishdan iborat.

Shuningdek, mazkur jarayonda yosh olimlar va tadqiqotchilarni tadqiqot faoliyatiga keng jalb etish, ularning salohiyatini rivojlantirish, izlanishlarini doimiy tarzda qoʻllab-quvvatlash ham ko‘zda tutilgan.

Alfraganus universiteti rektori Muhammadismoil Mahmudov mazkur masalaga to‘xtalib, “Yosh olimlar va tadqiqotchilar maktabi” ilmga qiziquvchi yoshlarni metodik jihatdan qo‘llab-quvvatlashda muhim omillardan biri bo‘lishini ta’kidladi. 

"Har qanday davlat rivojida ilm-fan sohasini rivojlantirish muhim ahamiyat kab etadi. Mazkur jarayonlarda yosh avlod vakillarini qo‘llab-quvvatlash, ularning ilmiy salohiyatini namoyon etishga ko‘maklashish har birimiz uchun ustovor vazifalardan biridir. 

Bugungi kunga qadar universitetimizda yosh olimlarga ilmiy-metodik jihatdan ko‘maklashish uchun turli darajadagi tadbirlar va loyihalarni amalga oshirib kelayotgan edik. Ammo bunda ilmga qiziqqan barcha yoshlarimizni bir joyga jamlash va qamrab olish imkoniyati biroz qiyinchilik tug‘dirayotgan edi. 

 “Yosh olimlar va tadqiqotchilar maktabi”ning yo‘lga qo‘yilishi bugungi kunda nafaqat bizning universitetimizdagi balki, barcha oliy ta’lim va ilmiy-tadqiqot muassasalaridagi ilmiy kadrlar uchun ayni muddao bo‘ldi, desam adashmagan bo‘laman", – dedi Muhammadismoil Mahmudov.

Bu orqali yosh olimlar va tadqiqotchilar uchun dolzarb mavzulardagi videodarslar, ilmiy risolalar va boshqa ma’lumotlar jamlanmasidan foydalanish, shu bilan birga, tadqiqotlarning zamonaviy metodologiyasi, maqolalar yozish va ularni nufuzli jurnallarda chop etish, himoya jarayoni bo‘yicha hujjatlar va talablardan xabardor bo‘lish kabi muhim yoʻnalishlarda foydali maʼlumotlarga ega bo‘ladilar.

Loyiha quyidagi yo‘nalishlarda amalga oshiriladi:

– “Yosh olimlar va tadqiqotchilar maktabi” ilmiy-amaliy onlayn oʻquv kursini tashkil etish;

– Ilmiy kengashlar va ularning faoliyati to‘g‘risida ma’lumotlarni taqdim etish;

– Tadqiqotchilar uchun foydali manbalar va ilmiy materiallarni muntazam ravishda taqdim etib borish;

– Ilmiy ishlanmalarni (maqolalar, dissertatsiya ishlarining avtoreferatlari, ilmiy risola va boshqalar) taqdim etish;

– Mahalliy va xalqaro OAK ro‘yxatidagi jurnallar, ular haqida to‘liq ma’lumotlar hamda maqola chop etish talablari bilan tanishtirib borish;

– Ilmiy tadqiqotlarning zamonaviy metodologiyasi va tadqiqotchilar uchun zaruriy havolalarni berib borish;

– O‘zbekistonda ilmiy-innovatsion faoliyatni amalga oshirishga oid me’yoriy-huquqiy hujjatlarni taqdim etish.

“Yosh olimlar va tadqiqotchilar maktabi” ilmiy-amaliy onlayn oʻquv kursi doirasida asosiy e’tibor izlanuvchilarni metodik jihatdan qo‘llab-quvvatlash, ularda zaruriy koʻnikmalarni shakllantirish, shuningdek, ilm-fan sohasida innovatsion yondashuvlarni keng targ‘ib etishga qaratiladi. Shuningdek, izlanuvchilar uchun tanqidiy fikrlash, dolzarb muammolarni hal etish, tadqiqotlarning amaliy natijalarini tayyorlash va taqdim etish bo‘yicha bilimlarini yangilab borish imkoniyati yaratiladi.