Joriy yilning 19-iyun kuni Taʼlimni rivojlantirish respublika ilmiy-metodik markazi hamda Xalqaro Nordik universiteti oʻrtasida hamkorlik memorandumi imzolandi.

Mazkur memorandumga asosan, quyidagi yoʻnalishlar boʻyicha hamkorlik aloqalarini oʻrnatish koʻzda tutilgan:

fan va taʼlim sohasidagi dolzarb muammolarni aniqlash hamda oʻquv jarayonini takomillashtirish boʻyicha ilmiy tadqiqot ishlarini hamkorlikda olib borish;

taʼlim sohasini rivojlantirishga qaratilgan innovatsion pedagogik texnologiyalarni, oʻqitishning samarali shakl va usullarini joriy qilish;

professor-oʻqituvchilar va soha mutaxassislari bilan hamkorlikda taʼlim jarayonida jahon ilm-fani va texnologiyalari yutuqlaridan keng foydalanish boʻyicha ilmiy-ommabop, oʻquv-uslubiy qoʻllanmalar va tavsiyalar ishlab chiqish;

hamkorlikda koʻchma oʻquv mashgʻulotlari va oʻquv-pedagogik amaliyotlar, magistratura bosqichi stajirovkalarini tashkil etish;

pedagog-oʻqituvchilar va Ishtirokchilar jamoasi oʻrtasida tajriba almashish, kelishuv asosida Finlyandiya taʼlim muassasalarida stajirovkalar, “Ustoz-saboqlari” (master-klass), seminar-treninglar, malaka oshirish kurslarini tashkil etish;

taʼlim ishtirokchilarini psixologik koʻllab-quvvatlash, zamonaviy oʻqitish usullarini joriy etish boʻyicha oʻquv kurslar, olimpiadalar, seminar-treninglar, ilmiy-amaliy konferensiyalar tashkil etish;

yangi tadqiqot loyihalarini amalga oshirishda mahalliy va xorijiy grantlarda ishtirok etish;

oʻqituvchilar va xodimlarning malakasini oshirish dasturlarini ishlab chiqish va amalga oshirishni tashkil etishda koʻmaklashish.

Memorandum ishtirokchilar oʻrtasida maktabgacha, umumiy oʻrta va maktabdan tashqari taʼlimi tizimida taʼlim mazmunini yangilash yoʻlida olib borilayotgan islohotlarni oʻzaro muhokama qilish, oʻqitish va oʻrganish amaliyotini tajriba, tadqiqot va izlanishlarning innovatsion usullari orqali zamonaviylashtirish, innovatsion gʻoyalar va yangi tashabbuslarni tatbiq etish, shuningdek hamkorlikda qoʻshma loyihalar ishlab chiqish uchun asos yaratadi.