Xalqaro tadqiqotlarga bagʻishlangan seminar tashkil etildi

Joriy yilning 17–19-dekabr kunlari Taʼlimni rivojlantirish respublika ilmiy-metodik markazida Toshkent shahridagi umumiy oʻrta taʼlim maktablarining tayanch maktab mentorlari va tajribali mutaxassislar uchun xalqaro PISA, PIRLS va TIMSS tadqiqotlariga bagʻishlangan uch kunlik seminar tashkil etildi.

Seminar davomida ishtirokchilarni xalqaro tadqiqotlar doirasidagi savodxonlik darajalari, mohiyati, baholash mezonlari bilan tanishtirish, ochiq eʼlon qilingan topshiriqlar bilan ishlash usullari va ularni oʻquv jarayonlariga integratsiyalash imkoniyatlari yoritib berildi.

Seminar jarayonida quyidagi masalalar muhokama qilindi:

– Oʻqish, matematika va tabiiy fanlar boʻyicha savodxonlikni baholash mezonlari va yondashuvlari;

– Oʻquvchilarning tanqidiy va ijodiy fikrlash koʻnikmalarini rivojlantirish uchun xalqaro tajribalar;

– PISA, TIMSS va PIRLS tadqiqotlarida qoʻllaniladigan ochiq topshiriqlarni tahlil qilish va ularning didaktik imkoniyatlarini oʻrganish.

Shuningdek, seminar davomida ishtirokchilar xalqaro tadqiqotlar tahlillariga koʻra oʻquvchilarning bilim va koʻnikmalarini oshirish hamda tanqidiy va kreativ fikrlash qobiliyatlarini rivojlantirish boʻyicha oʻzlarini qiziqtirgan savollariga mutaxassislar tomonidan javob oldilar. 

Ushbu bilimlar asosida:

– Mentorlar tomonidan yetakchi oʻqituvchilar bilan hamkorlikda xalqaro baholash tamoyillariga mos uslublar ishlab chiqiladi;

– Maktablarda oʻquvchilarning nazariy bilimlarini hayotiy koʻnikmalarga moslashtirish boʻyicha maxsus mashgʻulotlar tashkil etiladi;

– Seminar yakunida ishtirokchilar oʻzlarini qiziqtirgan savollar boʻyicha batafsil maʼlumot olish bilan birga, pedagogik tajriba almashish imkoniyatiga ega boʻldilar.

Bu kabi tadbirlar xalqaro tadqiqotlarni chuqur tushunishga va maktablardagi taʼlim sifatini oshirishga qaratilgan muhim qadam boʻlib xizmat qiladi.

Qayd etish lozim, O‘zbekiston Respublikasi Prezidentining 2024-yil 21-iyundagi PQ-231-son qaroriga muvofiq, 2025-yil 1-yanvardan boshlab pedagog va mutaxassis kadrlar kasbiy rivojlanishining uzluksizligini ta’minlash maqsadida barcha umumiy o‘rta ta’lim muassasalarida malaka oshirishning “Kasbiy rivojlanish soati”, tayanch umumiy o‘rta ta’lim muassasalarida esa, shuningdek, “Kasbiy rivojlanish kuni” kabi shakllari bosqichma-bosqich joriy etilishi ko‘zda tutilgan. 

Bunda “Kasbiy rivojlanish soati” va “Kasbiy rivojlanish kuni” tadbirlarini tashkil etish uchun har bir tuman (shahar)da yuqori malakali o‘qituvchilar orasidan fanlar kesimida mentor-o‘qituvchilar tarkibi shakllantiriladi.

“Kasbiy rivojlanish soati” doirasida fan metodika birlashmalari va mentor-o‘qituvchilar tomonidan o‘qituvchilarning darslari tahlil qilinadi, ularga metodik yordam ko‘rsatiladi, kasbiy rivojlanishi bo‘yicha tavsiyalar beriladi.

“Kasbiy rivojlanish kuni” doirasida har bitta fan bo‘yicha tayanch umumiy o‘rta ta’lim muassasalari tanlanadi va ushbu muassasalarda o‘qituvchilar uchun kasbiy rivojlantirish bo‘yicha o‘quv mashg‘ulotlari o‘tkaziladi.