Taʼlim jarayoni ishtirokchilarini psixologik qoʻllab-quvvatlash tizimi takomillashtiriladi

“Atrof-muhitni asrash va yashil iqtisodiyot yili”da amalga oshirishga oid davlat dasturida taʼlim jarayoni ishtirokchilarini psixologik qoʻllab-quvvatlash tizimini takomillashtirish bo‘yicha qator vazifalar belgilangan.

 Mazkur vazifalar ijrosini taʼminlash maqsadida, joriy yilning 27-mart kuni Taʼlimni rivojlantirish respublika ilmiy-metodik markazida vazirliklar, idoralar, ilmiy va taʼlim tashkilotlari vakillaridan tarkib topgan ishchi guruh yigʻilishi boʻlib oʻtdi.

Unda ishchi guruhga jalb etilgan Oʻzbekiston Fanlar akademiyasi, Ijtimoiy himoya milliy agentligi, Oliy taʼlim, fan va innovatsiyalar vazirligi, Abdulla Avloniy nomidagi milliy-tadqiqot instituti, Oʻzbekiston Milliy universiteti, Oʻzbekiston psixologlar uyushmasi, “Sharq аyoli” xalqaro ayollar jamoat fondi, 2-son ruhiy-asab kasalliklari dispanseri kabi tashkilotlardan mutaxassislar oflayn va onlayn formatlarda ishtirok etishdi.

Yigʻilishda bulling, suitsid holatlari, voyaga yetmaganlar tomonidan sodir etilayotgan huquqbuzarliklarning oldini olish hamda ularning oqibatlarini bartaraf etish yuzasidan pedagog kadrlar uchun interaktiv yondashuvlarga asoslangan maxsus kurs va dasturlarni ishlab chiqish masalalari muhokama qilindi.

Xususan, taʼlim oluvchilarga nisbatan zoʻravonlikka moyilligi mavjud boʻlgan pedagog kadrlarni aniqlash va ularga psixologik yordam koʻrsatish mexanizmlarini joriy etish ustuvor yoʻnalishlardan biri sifatida belgilandi.

 Shuningdek, oʻqituvchilarning kasbiy soʻnishini oldini olish, stressga bardoshlilik darajasini oshirishga qaratilgan simulyator va keyslar yaratish bo‘yicha ham ishchi guruh aʼzolariga aniq vazifalar taqsimlandi.