Pedagoglarning raqamli texnologiyalardan foydalanish ko‘nikmalari oshirildi

Oʻzbekiston Respublikasi Prezidentining “Oʻzbekiston — 2030” strategiyasi doirasida “Atrof-muhitni asrash va “yashil iqtisodiyot” yilida amalga oshirishga oid davlat dasturida taʼlim tizimini isloh qilish hamda sohaga innovatsiyalarni joriy etishga doir ustuvor vazifalar belgilab berilgan.

Mazkur vazifalar ijrosi doirasida joriy yilning 28-avgust kuni Taʼlimni rivojlantirish respublika ilmiy-metodik markazida “Raqamli taʼlim muhitida pedagogik kompetensiyalarni rivojlantirish va interfaol resurslardan samarali foydalanish” mavzusida oʻquv-amaliy seminar tashkil etildi. Unda 60 dan ortiq pedagoglar, metodistlar hamda taʼlim tizimi vakillari ishtirok etdi.

Tadbirdan koʻzlangan asosiy maqsad pedagoglarning raqamli taʼlim muhiti bilan ishlash boʻyicha kompetensiyalarini rivojlantirish, innovatsion yondashuvlar asosida taʼlim jarayonini samarali tashkil etish va interfaol resurslardan keng foydalanishga koʻmaklashishdan iborat.

Tadbirning ochilish qismida so‘z olgan Ta’limni rivojlantirish markazi direktori v.v.b. Yuliya Risyukova bunday tadbirlar ta’limda raqamlashuv jarayonida o‘zaro bilim va tajribalarni almashish va pedagogik mahoratni oshirishda muhim maydon bo‘lib xizmat qilishini ta’kidladi.

“Bugungi raqamli dunyoda pedagogdan faqat fan doirasida chuqur bilim va koʻnikmalar emas, balki dars jarayonida zamonaviy texnologiyalarni samarali qoʻllay olish mahorati ham talab etilmoqda.

Zero, yoshlarimiz smartfon, planshet va kompyuter kabi raqamli qurilmalar bilan hamnafas ulgʻaymoqda. Ularga nazariy va amaliy bilim olish uchun turli onlayn platformalar, simulyatsiyalar va interfaol resurslar orqali keng imkoniyatlar yaratilmoqda.

Shu bois, har bir pedagog oʻz faoliyatida raqamli texnologiyalarni faol qoʻllay olishi, ayniqsa darslarni qiziqarli va samarali tashkil etish uchun interfaol taʼlim resurslarini yaratish hamda ulardan samarali foydalanish koʻnikmalariga ega boʻlishi bugungi zamon talabiga aylanib ulgurdi.

Ishonamanki, mazkur seminar orqali sizlar yangi bilim va koʻnikmalarga ega boʻlasiz, oʻzingizni qiziqtirgan savollarga javob topasiz va tajribalaringizni yanada boyitasiz”, – dedi Yuliya Risyukova.

Ochiq va samimiy muloqot ruhida kechgan jarayonlarda soha rivojiga doir bir qator dolzarb mavzular muhokama qilindi. Jumladan, “Raqamli taʼlim resurslari va xizmatlari portali” boʻyicha umumiy maʼlumotlar berildi.

Shuningdek, “Zamonaviy pedagogik dasturiy vositalar yordamida interfaol resurslar yaratish oʻquv kursi” taqdim etildi. Ushbu kurs pedagoglarga interfaol taʼlim platformalari va virtual laboratoriyalardan samarali foydalanish orqali darslarni qiziqarli va interaktiv tashkil etish imkoniyatini yaratadi.

Bundan tashqari, “PISA 2025: Raqamli dunyoda oʻrganish” nomli uslubiy qoʻllanma ishtirokchilar eʼtiboriga havola qilindi. Unda xalqaro baholash dasturi doirasida raqamli texnologiyalarning oʻquv jarayonida tutgan oʻrni, baholash tizimi va metodologiyasi hamda zamonaviy taʼlimdagi qoʻllanilish imkoniyatlari keng yoritildi.

Seminar davomida ishtirokchilar oʻz tajribalari bilan oʻrtoqlashdilar, savol-javoblar boʻlib oʻtdi va raqamli taʼlim jarayonini yanada takomillashtirishga oid amaliy yechimlar muhokama qilindi.

Taʼkidlash joiz, dars jarayonlarining interaktivligini oshirish hamda pedagoglarni metodik jihatdan qo‘llab-quvvatlash maqsadida Ta’limni rivojlantirish respublika ilmiy-metodik markazi tomonidan “Yagona raqamli ta’lim resurslari va xizmatlari portali” ishga tushirildi.

Bugungi kunda mazkur portalga 7 mingdan ortiq raqamli resurslar joylashtirilgan bo‘lib, ular interfaol taʼlim resurslari va multimedia vositalari, virtual laboratoriya va simulyatsiyalar, STEM mashgʻulotlariga oid raqamli materiallar hamda boshqa turdagi taʼlimiy kontentni qamrab oladi.

Bu kabi tadbirlar taʼlim jarayonida innovatsion yondashuvlarni keng joriy etish, oʻqituvchilarning malakasini oshirish va raqamli taʼlim imkoniyatlarini samarali tatbiq etishga xizmat qiladi.