Umumiy oʻrta taʼlim maktablari psixologlari malakasi oshirildi

Joriy yilning 20-21-avgust kunlari poytaxtimizdagi  Nizomiy nomidagi O‘zbekiston milliy pedagogika universitetida Taʼlimni rivojlantirish respublika ilmiy-metodik markazi hamda Maktabgacha va maktab ta’limi vazirligi hamkorligida umumiy oʻrta taʼlim maktablari psixologlari uchun tashkil etilgan oʻquv-seminar o‘tkazildi.

Oʻzbekiston Respublikasi Prezidentining tegishli Farmoni bilan tasdiqlangan “O‘zbekiston — 2030” strategiyasini “Atrof-muhitni asrash va “yashil iqtisodiyot” yilida amalga oshirishga oid davlat dasturida ta’lim jarayoni ishtirokchilarini psixologik qo‘llab-quvvatlash tizimini takomillashtirish boʻyicha vazifalar belgilab berilgan.

Davlatimiz rahbari belgilab bergan vazifalarga asosan, tashkil etilgan ushbu seminarga mamlakatimizning turli hududlaridan 220 nafar yetakchi trener-psixologlar jalb etildi. Ularga sohada ulkan tajribaga ega bo‘lgan 18 nafar trenerlar o‘z bilim va tajribalarini ulashdi.

Tadbirdan ko‘zlangan asosiy maqsad maktab psixologlarining kasbiy bilim va koʻnikmalarini zamonaviy ilmiy yondashuvlar, innovatsion metodlar hamda amaliy psixologiya tajribasi bilan boyitish, jumladan:

– Oʻquvchilarning yosh va individual psixologik xususiyatlarini aniqlash va hisobga olish usullarini qoʻllash;

– Stress, konflikt va inqirozli vaziyatlarda samarali psixologik yordam koʻrsatish strategiyalarini oʻrganish;

– Ota-onalar va pedagoglar bilan konstruktiv muloqot olib borish koʻnikmalarini rivojlantirish;

– Taʼlim jarayonida motivatsiyani oshirish va ijobiy psixologik muhit yaratishdan iborat.

O‘quv seminarining birinchi kunida ishtirokchilarga psixologik xizmat koʻrsatishning normativ hujjatlari bilan ishlash, diagnostika va uning turlari, “Raqamli resurslari va xizmatlari” portalida ishlash, shuningdek, maktab psixologi faoliyatiga oid diagnostik instrumentlar, deviantologiya asoslari bo‘yicha atroflicha ma’lumotlar berildi.

Bundan tashqari, tadbir doirasida psixologlar uchun ertak terapiyasi, redjio pedagogika va art terapiya bo‘yicha ko‘rgazmali xonalar tashkil etildi.

Birinchi kun yakunida Maktabgacha va maktab ta’limi vaziri hamda maktab psixologlari o‘rtasida uchrashuv bo‘lib o‘tdi.

Ochiq, samimiy va konstruktiv ruhda kechgan muloqot davomida mutasaddilar va mutaxassislar o‘rtasida maktablarda ta’lim muhitini yana yaxshilash, o‘qituvchilarning va maktab psixologlarining kasbiy motivatsiyasini oshirishga doir qator masalalar muhokama qilindi.

Mashg‘ulotlarning ikkinchi kunida esa ishtirokchilar “Korreksiya va korreksion metodikalar”,”Ota-onalar bilan hamkorlik. Ota-onalar majlislari ssenariylari”, “Profilaktika: kasbiy va hissiy soʻnish, stresslarga bardoshlilik” hamda “Taʼlim ishtirokchilari uchun treninglarni shakllantirish” kabi mavzularda bilim va tajribalarini oshirish imkoniyatiga ega bo‘lishdi.

2 kunlik seminar yakunida barcha ishtirokchilar va trenerlar tegishli sertifikatlar bilan taqdirlandi.

Ta’kidlash lozim, bu kabi seminarlar hududlarda ham tizimli ravishda tashkil etilib, unda ishtirok etgan  psixologlar o‘z orttirgan bilim va tajribalarini hududlardagi 13 mingdan ortiq hamkasblari bilan bo‘lishadilar.