English
Русский
O'zbekcha
Ўзбекча
Joriy yilning 21-avgust kuni Nodavlat ta’lim muassasalari assotsiatsiyasi tomonidan "International teachers summit 2025" tadbiri tashkil etildi.
Unda respublikamizdagi Ta’limni rivojlantirish respublika ilmiy-metodik markazi direktori v.v.b. Yuliya Risyukova, O'zbekiston Nodavlat ta'lim muassasalari assotsiatsiyasi raisi Firuza Vaxabova, Puchon universiteti rektori Agreppina Shin, Toshkent shahar maktabgacha va maktab ta’limi boshqarmasi mutasaddilari hamda mamlakatimizdagi yetakchi nodavlat umumta’lim muassasalari vakillari ishtirok etishdi.
Samimiy va ochiq muloqot ruhida o‘tgan tadbirda nodavlat ta’lim muassasalarining yangi o‘quv yiliga tayyorgarlik jarayonlari, shuningdek, pedagoglar o‘rtasida o‘zaro bilim va tajriba almashishga oid bir qator masalalar muhokama qilindi.
Tadbirning ochilish marosimida Ta’limni rivojlantirish markazi direktori v.b. Yuliya Risyukova so‘zga chiqib, nodavlat ta’lim muassasalarining mamlakatimiz ta’lim tizimi rivojidagi ahamiyatiga to‘xtalib o‘tar ekan, soha mutaxassislari oldida turgan bir qator masalalarga e’tibor qaratdi.
"So‘nggi yillarda nodavlat ta’lim muassasalari sonining ortishi ham raqobat muhitini kuchaytirdi. Bu esa, o‘z navbatida, ta’lim tizimiga innovatsion yechimlarni joriy etish yo‘lini keng ochmoqda.
Natijada nodavlat ta’lim tashkilotlari yukning bir qismini o‘z zimmasiga olib, o‘quvchi-yoshlarni ta’lim bilan ta’minlashga hissa qo‘shmoqda.
Zamon shiddat bilan rivojlanmoqda. Sun’iy intellekt va raqamli texnologiyalar hayotimizga jadal sur’atlar bilan tatbiq etilmoqda. Biroq, bunga parallel ravishda, filtrlardan o‘tmagan ulkan axborot oqimi farzandlarimizga salbiy ta’sir ko‘rsatmoqda. Bu esa farzandlarimizning psixologik barqarorligiga alohida e’tibor qaratish zarurligini ko‘rsatadi.
Ushbu ehtiyojlardan kelib chiqib, Davlatimiz rahbari tomonidan tasdiqlangan “Atrof-muhitni muhofaza qilish va yashil iqtisodiyot” yili doirasida belgilangan vazifalarni amalga oshirishga oid davlat dasturida, markazimiz oldiga ta’lim jarayoni ishtirokchilarini psixologik qo‘llab-quvvatlash tizimini takomillashtirish vazifalari belgilab berilgan.
Mazkur topshiriqlarni bajarishni ta’minlash bo‘yicha bir qator ishlar amalga oshirilmoqda. Bu jarayonda, albatta, davlat sektori bilan bir qatorda nodavlat ta’lim tashkilotlari bilan ham keng ko‘lamli hamkorlik yo‘lga qo‘yilgan", – dedi Yuliya Risyukova.