Umumiy oʻrta taʼlim maktablari psixologlari uchun oʻquv-seminar o’tkazilmoqda

Bugun, 20-avgust kuni  Nizomiy nomidagi O‘zbekiston milliy pedagogika universitetida Taʼlimni rivojlantirish respublika ilmiy-metodik markazi hamda Maktabgacha va maktab ta’limi vazirligi hamkorligida umumiy oʻrta taʼlim maktablari psixologlari uchun tashkil etilgan oʻquv-seminar boshlandi.

Oʻzbekiston Respublikasi Prezidentining tegishli Farmoni bilan tasdiqlangan “O‘zbekiston — 2030” strategiyasini “Atrof-muhitni asrash va “yashil iqtisodiyot” yilida amalga oshirishga oid davlat dasturida ta’lim jarayoni ishtirokchilarini psixologik qo‘llab-quvvatlash tizimini takomillashtirish boʻyicha vazifalar belgilab berilgan.

Davlatimiz rahbari belgilab bergan vazifalarga asosan, tashkil etilgan shbu seminarga mamlakatimizning turli hududlaridan 220 nafar yetakchi trener-psixologlar jalb etildi.

Tadbirdan ko‘zlangan asosiy maqsad maktab psixologlarining kasbiy bilim va koʻnikmalarini zamonaviy ilmiy yondashuvlar, innovatsion metodlar hamda amaliy psixologiya tajribasi bilan boyitish, jumladan:

– Oʻquvchilarning yosh va individual psixologik xususiyatlarini aniqlash va hisobga olish usullarini qoʻllash;

– Stress, konflikt va inqirozli vaziyatlarda samarali psixologik yordam koʻrsatish strategiyalarini oʻrganish;

– Ota-onalar va pedagoglar bilan konstruktiv muloqot olib borish koʻnikmalarini rivojlantirish;

– Taʼlim jarayonida motivatsiyani oshirish va ijobiy psixologik muhit yaratishdan iborat.

Tadbirning ochilish qismida so‘z olgan Ta’limni rivojlantirish markazi direktori v.v.b. Yuliya Risyukova bunday tadbirlar sohada tajriba almashish, aniq yechimlarni muhokama qilish va yangi tashabbuslarni belgilash uchun muhim maydon boʻlib xizmat qilishini ta'kidladi.

“Bugungi uchrashuvimiz “Oʻzbekiston — 2030” strategiyasida belgilangan ustuvor vazifa — taʼlim ishtirokchilarini psixologik qoʻllab-quvvatlash tizimini takomillashtirish doirasida Maktabgacha va maktab taʼlimi vazirligi hamda Taʼlimni rivojlantirish respublika ilmiy-metodik markazi hamkorligida tashkil qilinmoqda.

Hammamizga maʼlum taʼlim tizimining juda muhim va masʼuliyatli yoʻnalishlaridan biri — maktab psixologiyasi hisoblanadi.

Bu yoʻnalish taʼlimning ajralmas qismi boʻlib, oʻquvchining oʻqishdagi yutuqlari, emotsional barqarorligi va shaxsiy rivojlanishiga bevosita taʼsir koʻrsatadi.

Siz — har bir bolaning ichki olamini tushuna oladigan, ularning qiziqish va ehtiyojlarini his qiladigan, ruhiy barqarorlik va ijtimoiy faollik sari yetaklaydigan mutaxassissiz.

Mazkur seminar sizning kasbiy tajribangizga yangi qirralar qoʻshadi, bilim va mahoratingizni yanada oshiradi.

Natijada, maktablarimizda yanada ijobiy psixologik muhit yaratiladi, har bir bola oʻz salohiyatini toʻliq roʻyobga chiqara oladi”, – dedi Yuliya Risyukova.

Shuningdek, Maktabgacha va maktab ta’limi vaziri o‘rinbosari Farhod Boqiyev bunday tadbirlar bilim va tajribalarni jamlash, metodik yondashuvlarni takomillashtirish, pedagoglarni ruhiy-pedagogik jihatdan mustahkamlashga qaratilgan muhim platforma bo'lishini ta'kidladi.

“Soʻnggi yillarda Davlatimiz rahbari tomonidan mamlakatimizda taʼlim sohasiga asosiy eʼtibor qaratilmoqda. Ushbu soha rivoji uchun esa avvalo maktablarimizda ijobiy muhit boʻlishi hal qiluvchi ahamiyat kasb etadi.

Bugun Sizlar 13 ming nafar hamkasblaringiz orasidan tanlab olinib, ikki kun davomida oʻz bilim va tajribalaringizni orttirasizlar. Ushbu seminar kaskad usulida tashkil etilib, bu jarayonlar viloyat, tuman, maktablarga qadar davom etadi.

Tan olish lozim, shu kunga qadar maktab psixologlarining malakasini oshirish, ularni metodik jihatdan qoʻllab-quvvatlash boʻyicha hal qilinishi lozim boʻlgan masalalarimiz yetarlicha.

Bundan tashqari, raqamli texnologiyalar rivojlanib borayotgan bugungi zamonimiz maktab psixologlarining ahamiyati qay darajada oshib borayotganini koʻrsatib turibdi.

Chunki,bugungi oʻquvchi kechagilardan tubdan farq qiladi. Ularga qulay taʼlim muhitini yaratish, ruhiy tomonlama qoʻllab-quvvatlash ham bugun bizdan har bir oʻquvchiga alohida yondashuv talab qiladi.

Shu nuqtayi nazardan, ishonamanki,oʻtkaziladigan mashgʻulotlar Sizlar uchun qiziqarli hamda yangi bilim va tajribalarga boy boʻladi”, – dedi Farhod Boqiyev.

O‘quv seminari doirasida pedagoglar uchun ertak terapiyasi, redjio pedagogika va art terapiya bo‘yicha ko‘rgazmali xonalar tashkil etildi.

O‘quv seminarining birinchi kunida ishtirokchilarga psixologik xizmat koʻrsatishning normativ hujjatlari bilan ishlash, diagnostika va uning turlari, “Raqamli resurslari va xizmatlari” portalida ishlash, shuningdek, maktab psixologi faoliyatiga oid diagnostik instrumentlar, deviantologiya asoslari bo‘yicha atroflicha ma’lumotlar berildi.

Mashg‘ulotlarning ikkinchi kunida esa ishtirokchilar “Korreksiya va korreksion metodikalar”,”Ota-onalar bilan hamkorlik. Ota-onalar majlislari ssenariylari”, “Profilaktika: kasbiy va hissiy soʻnish, stresslarga bardoshlilik” hamda “Taʼlim ishtirokchilari uchun treninglarni shakllantirish” kabi mavzularda bilim va tajribalarini oshirish imkoniyatiga ega bo‘lishadi.

Ta’kidlash lozim, bu kabi seminarlar hududlarda ham tizimli ravishda tashkil etilib, unda ishtirok etgan  psixologlar o‘z orttirgan bilim va tajribalarini hududlardagi 13 mingdan ortiq hamkasblari bilan bo‘lishadilar.