Bolalar musiqa va san’at maktablari, ixtisoslashtirilgan san’at va madaniyat maktablari hamda maktab-internatlari Avgust kengashi bo‘lib o‘tdi

Joriy yilning 15-avgust kuni poytaxtimizdagi “Turkiston” san’at saroyida Madaniyat vazirligi va Madaniyat ta’lim markazi tomonidan bolalar musiqa va san’at maktablari, ixtisoslashtirilgan san’at va madaniyat maktablari hamda maktab internatlari Avgust kengashi bo‘lib o‘tdi.

Unda Madaniyat vazirligi, Madaniyat ta’limi markazi, Ta’limni rivojlantirish respublika ilmiy-metodik markazi rahbariyati, shuningdek, madaniyat, musiqa va san’at sohasiga ixtisoslashtirilgan oliy ta’lim muassasalari, ixtisoslashtirilgan maktablar, maktab-internatlari pedagoglari, mutaxassislar, soha mutasaddilari ishtirok etdi.

Tadbirning ochilish marosimida so‘z olgan Ta’limni rivojlantirish markazi v.v.b. Yuliya Risyukova umumiy taʼlim tizimi bilan musiqa va sanʼat taʼlimi dasturlarini uygʻunlashtirishda pedagoglarga metodik yordam koʻrsatish, taʼlim jarayoniga innovatsion texnologiyalarni joriy etish boʻyicha koʻmaklashi markaz oldiga qo‘yilgan eng muhim maqsadlardan biri ekanligini ta’kidladi.

“Hurmatli Prezidentimiz sanʼat maʼnaviy boy avlod tarbiyasida beqiyos ahamiyatga egaligini va bu mehrni bolalikdan shakllantirish zarurligini doimo taʼkidlab keladilar.

Shu bois umumiy taʼlim tizimi bilan musiqa va sanʼat taʼlimi dasturlarini uygʻunlashtirish muhim vazifa sifatida belgilangan.

Ushbu maqsadlarga erishish uchun Markazimiz Madaniyat vazirligi huzuridagi Madaniyat taʼlimi markazi bilan hamkorlik memorandumini imzolab, birgalikda ish olib bormoqda.

Bilamizki, taʼlimdagi islohotlarning asosiy masʼuliyati, avvalo, siz aziz pedagoglar zimmasiga tushadi. Shuning uchun biz amalga oshirayotgan ishlarimizda sizlarning yordamlaringizga tayanamiz.

Biz ham oʻz navbatida Madaniyat taʼlimi markazi bilan hamkorlikda Sizlarga metodik yordam koʻrsatish, taʼlim jarayoniga innovatsion texnologiyalarni joriy etish boʻyicha koʻmaklashib borishni maqsad qilganmiz”, – dedi Yuliya Risyukova.

Ta’kidlash lozim, Avgust kengashi doirasida Bolalar musiqa va san’at maktablari direktorlari, direktorlarning o‘quv-ma’rifiy ishlar bo‘yicha o‘rinbosarlari, Ixtisoslashtirilgan san’at va madaniyat maktablari hamda maktab-internatlari direktorlari, direktorlarning o‘quv ishlari bo‘yicha o‘rinbosarlari, Qoraqalpog‘iston Respublikasi Madaniyat vazirligi, viloyatlar va Toshkent shahar madaniyat boshqarmalarining ta’lim muassasalari faoliyatini muvofiqlashtirish bo‘yicha bosh mutaxassislari uchun o‘quv-seminarlari tashkil etildi.