Taʼlimda inklyuzivlikni oshirish va psixologik qoʻllab quvvatlashni takomillashtirish masalalari muhokama qilindi

Oʻzbekiston-2030 strategiyasi doirasida, Oʻzbekiston Respublikasi Prezidentining 2025-yil 30-yanvardagi PF–16-son Farmoni “Atrof-muhitni asrash va yashil iqtisodiyot yilida amalga oshirishga oid davlat dasturida mamlakatimizda taʼlim tizimini rivojlantirish boʼyicha qator vazifalar belgilab berilgan.

Ushbu vazifalar ijrosini taʼminlash maqsadida Taʼlimni rivojlantirish respublika ilmiy-metodik markazi huzurida “Inklyuziv taʼlim va psixologiya” yoʻnalishi boʻyicha Ilmiy-metodik kengash faoliyati tashkil etildi.

Joriy yilning 6-avgust kuni mazkur kengashning 1-sonli yigʻilishi boʻlib oʻtdi. Unda Taʼlimni rivojlantirish markazi direktori v.v.b Yuliya Risyukova, Ijtimoiy himoya agentligi direktori oʻrinbosari Usmon Sharifxoʻjayev, markaz mutasaddilari hamda oliy taʼlim muassasalari professor-oʻqituvchilari, ekspertlar ishtirok etdi. 

Yigʻilish davomida sohada ilmiy-metodik yondashuvlarni takomillashtirish, inklyuziv taʼlim va psixologiya yoʻnalishida ilgʻor tajribalarni joriy etish masalalari muhokama qilindi.

Tadbirni kirish soʻzi bilan ochib bergan Taʼlimni rivojlantirish markazi direktori v.v.b Yuliya Risyukova sohada inklyuzivlikni oshirish hamda taʼlim jarayoni ishtirokchilarini psixologik qoʻllab-quvvatlashning muhimligiga toʻxtalib, kengashda koʻtariladigan masalalar dalillarga asoslangan qarorlarni qabul qilishda muhim omillardan biri boʻlishini taʼkidladi.

“Oʻzbekiston Respublikasi Prezidentining 2025-yil 30-yanvardagi PF-16-son Farmoni bilan qabul qilingan davlat dasturida Taʼlimni rivojlantirish respublika ilmiy-metodik markaziga bir qator vazifalar, jumladan, taʼlim jarayoni ishtirokchilarini psixologik qoʻllab-quvvatlash vazifasi ham belgilangan.

Ushbu topshiriq ijrosini taʼminlash maqsadida Markaz huzurida “Inklyuziv taʼlim va psixologiya” yoʻnalishidagi ilmiy-metodik kengash tashkil etildi. Kengashimiz tarkibiga ushbu sohada katta amaliy tajriba va ilmiy salohiyatga ega boʻlgan olimlar va mutaxassislar jalb etildi.

Bugungi yigʻilishda kengash aʼzolari bilan tanishish, soha rivoji uchun amaliy choralarni muhokama qilish va boshqa bir qator masalalarni koʻrib chiqish rejalashtirilgan.

Ishonchim komilki, kengash aʼzolarining ilmiy salohiyati va tajribasi mamlakatimizda inklyuziv taʼlim va psixologik xizmatni yanada rivojlantirishda muhim rol oʻynaydi”, – dedi Yuliya Risyukova.

Muhokamalar yakunida yigʻilishda koʻtarilgan masalalar boʻyicha muloqotlarni izchil davom ettirishga kelishga kelishib olindi.