"Raqamli savodxonlik – zamonaviy pedagogning asosiy kompetensiyasi" mavzusida amaliy seminar bo‘lib o‘tdi

Joriy yilning 6-avgust kuni Ta’limni rivojlantirish respublika ilmiy-metodik markazida o‘qituvchilar uchun sun’iy intellektni ta’limga joriy etish bo‘yicha “Raqamli savodxonlik – zamonaviy pedagogning asosiy kompetensiyasi” mavzusida amaliy seminar tashkil etildi.

Unda Ta’limni rivojlantirish respublika ilmiy-metodik markazi mutasaddilari hamda poytaxtimizdagi umumta’lim maktablarining STEM yo‘nalishiga ixtisoslashtirilgan fan o‘qituvchilari ishtirok etdi.

Ochiq muloqot tarzida amaliy tajribalarga boy tarzda o‘tkazilgan tadbir doirasida STEM mashg‘ulotlarining raqamli resurslari platformasidan foydalanish hamda Sun’iy intellektni ta’limga joriy etish bo‘yicha o‘qituvchilar uchun malaka oshirish kursi taqdimoti bo‘lib o‘tdi.

Tadbirda Ta’limni rivojlantirish markazi direktori v.v.b Yuliya Risyukova  ta’lim jarayonlarida pedagoglar uchun zamonaviy axborot texnologiyalaridan samarali foydalanishning ahamiyatiga to‘xtalib o‘tar ekan, ushbu yondashuv bilimli, tashabbuskor va innovatsion fikrlovchi avlodni tarbiyalashda muhim ahamiyat kasb etishini ta’kidladi.

“Bugungi kunda sun’iy intellekt texnologiyalari jahon miqyosida katta o‘zgarishlar yasayotgani, ayniqsa, ta’lim tizimida tub burilishlar qilayotgani hammamizga ayon.  Endilikda o‘qituvchilar va o‘quvchilar uchun yangicha o‘qitish va o‘rganish usullari, innovatsion platformalar, individual yondashuvlar paydo bo‘lmoqda.

Tadbir davomida o‘tkaziladigan mashg‘ulotlar aynan shu imkoniyatlardan unumli foydalanish, zamonaviy texnologiyalarni ta’lim jarayoniga samarali integratsiya qilishga qaratilgan. Siz, hurmatli pedagoglar, ChatGPT, Canva, Gamma SI, Perplexity kabi ilg‘or vositalarni o‘zlashtirib, ularni darslarda foydali qo‘llash ko‘nikmalarini hosil qilasiz.

Bizning maqsadimiz – o‘qituvchilarning raqamli savodxonligini oshirish va ta’lim sifatini yangi bosqichga olib chiqishdir. Zero, sun’iy intellektni ta’limga joriy etish orqali biz bilimli, tashabbuskor va innovatsion fikrlovchi avlodni tarbiyalaymiz", – dedi Yuliya Risyukova.

Ta’kidlash lozimki, o‘qituvchilar uchun tashkil etilgan sun’iy intellektni ta’limga joriy etish bo‘yicha 72 soatlik dastur asosida tashkil etiladigan malaka oshirish kursi nazariy va amaliy mashg‘ulotlarni o‘z ichiga oladi.

Unda respublikamiz ta’lim tizimidagi o‘qituvchilarning raqamli kompetensiyalarini rivojlantirish va zamonaviy ta’lim texnologiyalaridan samarali foydalanish va sun’iy intellektning keng imkoniyatlarini ta’limga joriy etish bo‘yicha qobiliyatlarini shakllantirish maqsadida ishlab chiqilgan.

Kursning asosiy vazifalari quyidagilardan iborat:

– O‘qituvchilarga sun’iy intellekt texnologiyalari bo‘yicha fundamental bilimlar berish;

– Ta’lim jarayonida SI vositalaridan foydalanish ko‘nikmalarini rivojlantirish;

– Raqamli ta’lim resurslarini yaratish va ulardan samarali foydalanish usullarini o‘rgatish.

– O‘quvchilarning individual ehtiyojlarini qondirish uchun SI imkoniyatlaridan foydalanish.

– Ta’lim sifatini oshirish va zamonaviy ta’lim muhitini yaratish.

Kurs quyidagi zamonaviy modullardan tashkil topgan:

– Sun’iy intellekt asoslari va ta’limdagi roli.

– ChatGPT platformasidan foydalanish.

– Canva platformasidan foydalanish.

– Gamma SI platformasidan foydalanish.

– Perplexity platformasidan foydalanish.

Malaka oshirish kursi ishtirokchilari nazariy bilimlarni olish bilan birga, amaliy loyihalar ustida ishlab, real ta’lim vaziyatlarida sun’iy intellekt vositalarini sinab ko‘radilar.

Kurs davomida quyidagi usullardan foydalaniladi:

– Amaliy tajriba — turli SI vositalari bilan bevosita ishlash;

– Loyiha asosidagi ta’lim — real ta’lim muammolarini yechish;

– Hamkorlik va guruh ishi — tajriba almashish va birgalikda ishlash;

– Refleksiya va tahlil — o‘rganilgan materiallarni qayta ko‘rib chiqish.

Bu kurs nafaqat o‘qituvchilarning professional rivojlanishiga, balki butun ta’lim tizimining sifat ko‘rsatkichlarini yaxshilashga ham xizmat qiladi. Sun’iy intellekt texnologiyalarini to‘g‘ri va samarali qo‘llash orqali har bir o‘quvchining individual ehtiyojlarini qondirish va ularning imkoniyatlarini to‘liq ochib berish mumkin bo‘ladi.